အင်္ဂလန်အသင်းနည်းပြ ဖေဘီယို ကာပယ်လိုသည် ဘာမင်ဂမ် ဂိုးသမား ဂျိုးဟတ်ကို အင်္ဂလန် အသင်းသုိ့ ပြန်လည် ခေါ်ယူလိုက်ပြီ ဖြစ်သည်။
အသက် ၂၂ နှစ်အရွယ် ဂျိုးဟတ်သည် မန်ချက်စတာ စီးတီး အသင်းမှ ဘာမင်ဂမ်အသင်းသို့ အငှားစာချုပ်ဖြင့် လာရောက် ကစားနေသူ ဖြစ်သည်။
"ဟတ် က ဒီရာသီမှာ အကောင်ဆုံး ပုံစံကို ရထားတာ တွေ့ရပါတယ်။ အမှားအနည်းငယ် ပြုလုပ်တတ်ပေမယ့် ပုံမှန် ပွဲထွက်ခွင့် ရနေပြီး ယုံကြည်မှုလည်းပိုပြီး ရရှိလာတာ တွေ့နေရပါတယ်" ဟု ကာပယ်လိုက ပြောဆိုခဲ့သည်။
ယခုကဲ့သို့ ဂျိုးဟတ်အား အင်္ဂလန် အသင်းတွင် ပြန်မြင်တွေ့ရခြင်းမှာ ဒဏ်ရာများနှင့် ရုန်းကန်နေရသော ဒေးဗစ်ဂျိမ်း လက်စွမ်း ပျောက်နေသည့် ရောဘတ်ဂရင်းနှင့် ဘင်ဖော်စတာ တို့ကြောင့် ဖြစ်သည်ဟု သတင်းများက ဆိုသည်။
ဂိုးသမား ဂျိုးဟတ်သည် ၂၀၀၈ ခုနှစ် ထရီနီဒက်နှင့် တိုဘာဂို အသင်းကို ၃ ဂိုး ဂိုးမရှိနှင့် အနိုင်ရခဲ့သော ပွဲတွင် အင်္ဂလန် အသင်း အတွက် ပထမဦးဆုံး ပွဲထွက် ကစားခွင့်ရခဲ့သည်။
ယင်းနောက်ပိုင်းတွင် ဂျိုးဟတ်သည် ကာပယ်လို၏ ရွေးချယ်ခြင်းကို ခံခဲ့ရသော်လည်း ကမ္ဘာ့ဖလား ခြေစစ်ပွဲနှင့်အခြား ခြေစမ်းပွဲများ တွင် ပါဝင်လက်စွမ်း ပြခွင့် မရရှိခဲ့ပေ။ |
