မြန်မာ အသင်းသည် ယနေ့ညနေတွင် ကစားမည့် AFC Challenge Cup ဆီမီးဖိုင်နယ် ပွဲတွင် ပြိုင်ဘက် မြောက်ကိုးရီးယား အသင်းကို ကြောက်ရွံ့နေမည် မဟုတ်ကြောင်း မြန်မာ အသင်း နည်းပြ ဦးတင်မြင့်အောင်က  ပြောကြားခဲ့သည်။
   ယခု ဆီမီးပွဲတွင် မြန်မာ အသင်း အနေဖြင့် တိုက်စစ်မှူး ရန်ပိုင်ပြန်လည် ပါဝင်လာမည် ဖြစ်သော်လည်း ကွင်းလယ် အဖျက် ကစားသမား အောင်ကျော်မိုး ပွဲပယ် ပြစ်ဒဏ်ကြောင့် လွဲချော်မည် ဖြစ်သည်။
   "ရန်ပိုင် ပြန်လည် ပါဝင်လာတာဟာ ကျွန်တော်တို့ အတွက် ကောင်းမွန်တဲ့ လက္ခဏာ တစ်ခုပါ။ ဒါပေမယ့် ဒီပွဲဟာ ခက်ခက်ခဲခဲ ကစားရမယ့် ပွဲတစ်ပွဲပါ။ ကစားသမားတွေကို စိတ်ဓာတ်ပိုင်းမှာ အထူး မြှင့်တင်ပေးထားပါတယ်။ ဒီပွဲအတွက် ဘာလုပ်ရမယ် ဆိုတာ သူတို့ သိထားကြပါတယ်။ ကွင်းလယ် ကစားသမား တစ်ယောက် ပွဲပယ် ပြစ်ဒဏ်ကြောင့် မပါဝင် နိုင်တာကိုတော့ စိတ်ပျက်မိပါတယ်။ ဒါပေမယ့် ကျွန်တော့်မှာ ရွေးချယ် အစားထိုးစရာ အစီအစဉ်တွေ အများကြီးရှိပါတယ်။
   မြောက်ကိုးရီးယား အသင်းဟာ အလွန်တောင့်တင်းတဲ့ အသင်းတစ်သင်းဆိုတာ သိထားပါတယ်။ ဒါပေမယ့် ကျွန်တော်တို့ အကောင်းဆုံး ယှဉ်ပြိုင် ကစားသွားမှာပါ" ဟု ဦးတင်မြင့်အောင်က ပြောကြားခဲ့သည်။
    မြောက်ကိုးရီးယား နည်းပြ ဂျိုတောင်ဆွပ်ကလည်း မြန်မာတိုက်စစ်မှူး ရန်ပိုင်ကို အထူး သတိထားရမည်ဟု ပြောဆိုထားသည်။
     "သူက အရပ်ရှည်တော့ ကျွန်တော်တို့ အထူးပြင်ဆင်ထားရပါတယ်။ ပြီးတော့ သူက နေရာယူတတ်တယ်။ ခေါင်းတိုက်ဘောတွေလည်း ကောင်းတယ်။ ဘောလုံး ဖြန့်ဝေတဲ့ အပိုင်းမှာလည်း ကောင်းတယ်။ ဒါကြောင့် သူ့ကို ဘယ်လို ထိန်းချုပ်ရမယ်ဆိုတာ ပြင်ဆင်ထားပါတယ်။ မြန်မာအသင်း အကြောင်းကို သိထားပြီးပါပြီ။ ၂၀၀၈ ပြိုင်ပွဲ တုန်းကလည်း သူတို့နဲ့ ကစားခဲ့ဖူးပါတယ်။ ကျွန်တော်တို့ အနေနဲ့ နည်းဗျူဟာပိုင်း အရည်အသွေးကို ပြသဖို့ လိုအပ်ပါတယ်။ နှစ်သင်း စလုံးဟာ ရည်မှန်းချက် တူညီနေကြပါတယ်။ မြန်မာအသင်းဟာ လျင်လျင်မြန်မြန် ကစားတတ်တော့ ကျွန်တော့်အနေနဲ့ တိုက်စစ်နဲ့ ခံစစ်ကို အထူး ပြင်ဆင်ထားပါတယ်" ဟု နည်းပြ ဂျိုတောင်ဆွပ်က ပြောကြားခဲ့သည်။